Una pariga de dies a oe apo lìgidu su tìtulu de unu artìculu de unu famadu giornale sardu chi m’at fatu isprapeddare is ogros.
Naràt “Turismo in Sardegna. Senza auto le ferie diventano un calvario”, e sighiat: “in un mondo perfetto, ma anche meno, dovrebbe essere possibile spostarsi sui mezzi pubblici PERLOMENO verso le località turistiche”.
Ma pro ite diant dèpere tènnere prioridade in sa mobilidade is logos a ue andant is turistas? Forsis ca chie bivit in una bidda – manna o pitica chi siat – a ue non andant turistas meda, non tenet su matessi deretu a si mòvere de chie bivit in S’Alighera o Santu Tiadoru de Uviddè?
Mi nde so ispantadu, che a semper, ma cussas paràulas non sunt una novidade. Est sceti unu de is millis e prus artìculos chi si podent agatare in s’arretza, de is milli e prus servitzos de telediàrios, de is millenas de cumentos chi si podent lìgere in is sòtzial e chi faghent essire a pìgiu is chi sunt ideas ispainadas meda:
Non ddoe at trenos e postales? Mischinos is turistas! Amancat s’àcua? Mischinos is turistas! Is istradas sunt totu derrocadas? Mischinos is turistas! Su logu est brutu? Oja mamia ite orrore, podet istesiare a is turistas! E pro arribare a s’atualidade: is turbinas a bentu ant a isconciare su sartu, su mare e su monte? Oja mamia ite orrore, podet èssere chi non bèngiant prus turistas!
E nois, is chi in Sardigna ddoe bivimus totu s’annu? Parrit chi si nde iscaressemus de nois etotu e de is bisòngios nostros, parrit chi nos depimus giai giai cubare pro no istrobare, o a s’in prus nos depimus fàghere bìdere sceti che ornamentu in unu logu totu allichididu pro is turistas, mancari istrochende is traditziones nostras pro ddos fàghere ispassiare cun manifestadas chi umiliant sa cultura nostra che is carrasegares de istiu.
Calicunu pensat, forsis, chi aconciende su logu pro chi siat totu allichididu pro is turistas, custu at a èssere bellu fintzas pro nois, ma est una fàula manna, est beru a s’imbresse.
Su chi serbit a su turista est cosa chi andat bene pro pagu dies: unu logu pro papare, unu logu pro dromire, una manera pro lòmpere a is logos prus connotos e forsis unu logu belligheddu pro si bufare una cosa a merie pustis de àere passadu sa die gira gira. Chi una istrada est totu istampada pagu ddis cambiat, antzis, forsis s’ispàssiant de prus puru ca ddi parrit de bìvere una “esprièntiza autèntica”.
Ma su chi serbit a nois funt trenos e postales pro non nos dèpere mòvere semper a vetura, sunt istradas bellas chi nos permitant de lòmpere a totue sena nos iscònciare is veturas, sunt iscolas pro is fìgios nostros, sunt ispidales pro nos curare totu s’annu, sunt atividades culturales finas in atòngiu, ierru e beranu e non isceti intro làmpadas e capudanni.
Fraigare logos a medida de turista custas cosas non ddas portat, ca is turistas non ddas abbisòngiant.
Sa solutzione, fortzis, est prus fàcile de su chi podimus imaginare: cumintzare a pensare a nois, a su chi abisongiamus nois. Aici amus a cuncordare unu logu pro ddoe bìvere totu s’annu, amus a cuncordare unu logu chi si est bellu pro nois tando est bellu finas pro chie innoghe ddoe benet una chida ebbia.
Fintzas pro is fanàticos de su turismu sa mellu cosa diat èssere a fàghere comente chi is turistas non ddoe esserent. Si sighimus comente fintzas a oe amus fatu, pensende chi is logos chi bivimus diant dèpere èssere funtzionales PERLOMENO pro chie in Sardigna passat una chida a s’annu, tando custos logos s’ant a furriare luegu in pratzas de giogos mesu boidas e sena servìtzios a longu tretu, s’ant a furriare in logos pòberos de cultura, de vida, de gente e de benidore.
Fotografia: https://it.freepik.com/
I commenti saranno sottoposti ad approvazione prima della pubblicazione.
Beridade manna.
Su turismu etotu leat cun issu una idea de colonialismu, paris che a totus sas ateras forma de ispeculatzione e impositziones.
E tocat a amentare ca su turismu podet imbruttare su logu cantu – po narrere – sa Saras e su petrolchimico de Sarrocu, e massimamente imbruttat sa cusientzia comuna de su logu ponendo minettas mannas a su benidore de sa cultura locale.
Comente si sunt agattande peris in medas tzitades e sartos in totu s’europa, punnande contra a su ‘overtourism’ e sa ‘gentrification’ chi su turismu at leau.
Una cosa chi mi dipraxet meda est chi personas meda e finas giòvunus dedicant unu muntone de energias a cuncordade atividades chi “isperemus fetzant arribare is turistas”, prus che totu chistionende de is àreas de a intro, comente chi is turistas bèngiant a nosi bogare dae una situatzione de istrobu. Si totu cussas energias ddas dedicaiamus a organizare – o pretendere – servitzios chi serbint pro primu cosa pro nois, tando ndi diasu a tènnere profetu totus!