Terna at a collegai sa Sitzìlia e sa Sardìnnia cun su continenti italianu po mori de unu cavu sutamarinu dòpiu: su Tyrrhenian Link, unu passàgiu elètricu nou in mesu de su Mediterràneu mari. Est unu trabballu mannu meda, ùnicu in su mundu: 970 chilometrus de longària e 1000 MW de potèntzia. Su collegamentu at a amellorai sa capassidadi de cuncàmbiu elètricu, at a favoressi s’adelantamentu de s’energia annoàbbili e sa seguràntzia de s’arretza.
Su progetu cumpriu est fatu de duus arrogus: unu andat de sa Sitzìlia a su continenti, e s’àteru de sa Sitzìlia a sa Sardìnnia.
Su tretu “est” acàpiat s’aprodu de Fiumetorto, in su comunu de Termini Imerese, Sitzìlia, cun s’aprodu de Torra Tuscia Magazzeno in Battipaglia, Campania.
S’arrogu ovest tenit una longària de 480 chilòmetrus, e acàpiat s’aprodu de Fiumetorto cun su de Terra Mala, in Sardìnnia.
Su progetu balit 3,7 miliardus de èurus.
Totu perfetu? Nono.
Su pòpulu sardu, is chi bivint in citadis e biddas interessadas, no ddus ant ascurtaus. No si cumprendit ita nci ant a godangiai is sardas e is sardus.
Seus segurus chi in Sardìnnia ant detzìdiu de fai lompi is cavus sutamarinus in d-una zona naturali (Terra Mala) e no in zona industriali, comenti ant fatu in Sitzìlia. Poita? Poita a sa genti de Cuartu e Ceraxus no dd’ant donau totus is noas chi ddi depiant donai? Poita su dinai chi arriceus po su strobbu e su dannu est prus pagu de su chi donant a is sitzilianus?
A prus de s’aprodu in Terra Mala, Terna at detzìdiu chi de fraigai de sutastatzioni in su comunu de Ceraxus, in su sartu, fatu po sa messarìtzia, chi is polìticas pùbricas si-ndi dd’ant scarèsciu in is ùrtimas dexenas de annus. Ma insaras ddu donaus a Terna sceti poita pròpiu ananti a aundi bolint fai sa sutastatzioni custa tenint una àtera centrali, e insaras arrespàrmiant?
De seguru a fraigai s’aprodu e sa sutastatzioni in s’àrea industriali, est a nai in d-unu logu aundi no tocat a ocupai àtera terra ghetendi àteru cimentu, iat a essi costau de prus. Cantu de prus, biu chi su costu de su progetu est 3,7 miliardus de eurus? Cantu balit sa dinnidadi de is sardus? Cantu balit sa defensa de sa naturalesa? Cantu balit su provai a aguantai unu benidori de messarìtzia po su sartu de Ceraxus? O si boleis totus camareris e guàrdias de pàlias eòlicas?
Segurus ndi seus chi su Tyrrhenian Link serbat a is sardas e sardus? Giorgia Meloni, calincunu mesi a oi, at nau: “Cun d-unu pagu de abilesa e de dinai gastau beni podeus fai de sa parti de bàsciu de s’Itàlia su logu aundi produsi energia po totu s’Europa”. Giacomo Donini, diretori progetus mannus e adelantamentu internatzionali de Terna, po su chi pertocat su Tyrrhenian Link, at nau fueddus crarus: “S’energia annoàbbili andat e benit e insaras depeus pensai a fraigai una arretza po dda movi de una parti a s’àtera: una arretza chi serbat a dda movi de aundi dda faint a aundi serbit, est a nai de s’Itàlia de bàsciu a s’Itàlia de susu, aundi is famìllias e is indùstrias dda podint spaciai”.
Su Tyrrhenian Link est aintru de custa bidea, legìtima ma no bona po is sardas e is sardus. A produsi energia “birdi” in is logus pòburus, po sighiri a fai godangiai is logus arricus est una manera de sighiri s’arrelata coloniali intre Sardìnnia e is logus arricus.
Aintru de custu disinnu, a is sardus no ddis donant bastanti dinai, ni bastanti trabballu, ni sa possibilidadi de detzidi ita fai e comenti ddu fai, comenti ant fatu sitzilianus e campanus. Calincunu in Sardìnnia s’est inchietau e at nau: “imoi dd’acabbais, boleus sa parti nosta nosu puru”. Sballiau est? O depeus sighiri a incrubai sa conca a su Tyrrhenian link e cosas diaici?
Imàgini: comitatonotyrrhenianlink.wordpress.com
