Lu campu no si ’esti
di gala piú, ne d’allégri culóri;
in àbiti funesti
mi si mustra la rósa, e l’alti fióri;
l’alburéddi frunduti
tutti pal me di dólu so vistuti.
V’è luttu e luttu e dólu e dólu, pinséri íntimu e pinséri sociali. Li paràuli di “Lu pintimentu” di don Baignu óggji ani un pésu diffarenti, e lu luttu e li muttii chi fàcini nascí chistu sintitu, mirendi lu paisaggju, m’attúmbani in piú di una manéra.
Illa me’ ’ita araggju fattu cintinaja di ’olti lu caminu da Caragnani a Tèmpiu, e podaria discriillu a occji cjusi. Da la zona altigianali m’ammentu l’odóri intensu di la maccja chi si míscia a chissu rudu di súaru budditu. Dapói fràbbichi, l’ísula ecológica, la rampa finz’a li supalmalcati e l’incumènciu di la citai. Lu trattu piú beddu pal me imbara sempri da la scansata pa’ La Talga finz’a la sèmita pa’ Pascarédda e la Funtana di li Paladini.
Li campagni chi cunniscimu so pieni di rii longhi, frischi, chi ci accumpàgnani illi ciurrati di caldana. Di ’igni, chi da sempri fàcini palti di li momenti familiari nostri di ricréu e d’apprindimentu. Vi so campi manni undi l’animali pàscini, li stazzi e li fràbbichi altigianali rapprisèntani la saittú di li nostri mastri e di li nostri maggjóri. Vi so monti e buschi manni, di licci e súara, chi appaltènini a la ’ita di li passoni da gjinirazioni e gjócani un rólu d’impoltu mannu ill’ecunumia e illa socetai di chisti lóchi.
Vi so parò alti buschi nói, buschi di farru, distinati a sóli e ventu, chi da un pocu di tempu pònini radici illi campagni gaddurési. No so siguramenti una nuitai. Unu di li paisaggji piú impultanti e significativi di la me’ pizzinnia éra lu di li monti di Bultiggjata, chi da minurédda mi spantaa a figgjulà, ammirendi comu lu ’entu facia gjirà chisti pali manni e pruducia enelgia.
Óggji è impultanti abbeddu esse bravi a cumprindí chi lu rinnóu di li paisaggji nasci a spissu da l’esigènzia di fraicà soluzioni pa’ prublemi cumuni e pa’ lu be’ di la socetai. Chisti buschi nói, parò, ani una pusizioni diffarenti illu sintitu di li passoni, a lu mancu siddu chi pinsemu a lu liamu chi vi doaria esse cu’ la gjenti di lu lócu e lu so be’. Chista pusizioni è, a dólu mannu, duuta pa’ lu piú da meccanismi pulítichi e económichi mal’a murí, discritti da l’occupazioni e lu sfruttamentu di li tarri da palti di socetai angeni, disignatu da entitai chi no rispèttani la ’ulintai di li pópuli, chi ani impattu innantu a lu rappoltu tra li paisaggji e li comunitai chi l’abitíggjani.
Própriu in chisti tempi undi ci agattemu a accarà la chistioni di la transizioni ecológica è impultanti apprufundí e aé cuscènzia di lu rólu di l’azioni umana illi cambiamenti di l’ambienti. Lu pudemu fà paltendi da l’ussilvà comu illu tempu chisti azioni ani mudificatu li paisaggji naturali, trasfulmèndili in paisaggji culturali. Pal chistu mi piaciaria andà a fundu di l’algumentu rasgiunendi in manéra un pocu piú accadémica.
L’idea di l’Omu chi trasfolma e duminiggja la tarra à sempri fattu palti di la nostra spirienza, da li tempi di la mitologia (Promèteu chi fura lu fócu a li dei) a li rivoluzioni scentífichi di lu séculu XVII, chi ani postu li fundamenti pa’ la rivoluzioni industriali di lu séculu sighenti. Celt’e cali pinsadóri chi cridíani a la teoria di lu ditilminismu ambientali, pinsàani chi li tratti culturali diffarenti di li pópuli érani l’isprissioni di fattóri naturali chi si misciàani tra iddi, e tra chisti lu clima.
Lu geògrafu tedescu Carl Ritter, campatu tra la sigunda mitai di lu séculu di XVIII e la primma di lu séculu XIX, vidia la tarra com’e lu campu undi li pópuli si saríani a pocu a pocu puduti emancipà da l’assuggjittamentu a la natura.
La Tarra è un sistema dinàmicu, undi li cumpunenti culturali e naturali s’influinzíggjani tra paru in manéri cumplessi. È suggjetta a mutamenti duuti a eventi naturali ma puru a l’azioni umana. Lu sistema culturali umanu (idiulógicu, tecnulógicu, sóciu-ecunómicu, pulíticu) esisti indrentu a lu sistema naturali tarrestri: l’Omu pó pruà a assintallu sólu siddu chi poni menti a li leggji di la natura, chi so mali a cambià, comu mustra lu casu di lu cambiamentu climàticu.
Lu geògrafu umanista Lucio Gambi susteni chi l’Omu tratta la natura pa’ “plasmà e frabbicà la tarra in manéra umana, casi pa’ fulmanni una sója”. E siddu pinsemu a li spàzii ulbani di óggji, no pudemu no esse d’accoldu. Lu cuncettu di paisaggju geogràficu l’à intrudottu lu naturalista tedescu Alexander Von Humboldt, chi ussilvaa li fenòmeni geogràfichi comu s’ussèlvani li pinturi, ma dipinti da la natura e da l’istória. Chista mirata s’è palduta pa’ effettu di lu Positivismu, candu lu paisaggju éra divintatu una entitai puramenti uggjittiva, chi silvia a li geògrafi pa’ studià in manéra ditilminística e pussibbilística li rappolti tra ambienti e pópuli.
Gambi à criticatu própriu chistu mètudu, palchí pa’ iddu ussilvà lu paisaggju no splica nudda, dà sólu l’ignitti pa’ puní in relazioni tra iddi li fatti palési, chena cunsidarà li chi no si ’ídini. Sigundu Gambi bisogna cumprindí l’istória di la fulmazioni di lu paisaggju e la so’ mutanza. Un altu elementu fundamintali pa’ lu geògrafu è lu di distinghí li paisaggji da li tarritórii e da l’ambienti, paltendi da lu cuncettu di paisaggju com’e mediazioni tra la rialitai e la mirata, tra l’estéticu e lu razionali, tra lu sintí e lu fà di lu suggjettu e di la collettivitai.
Lu geògrafu e antropòlogu francésu Augustin Berque palti da chistu cuncettu pa’ fulmà lu di lu paisaggju com’e palinsestu, una pelgamena chi è stata scritta, razzicata e turrata a scrií piú volti e chi, pal chista casgioni, cunselva ancóra li signi di lu ch’è statu impressu in tutti l’èpuchi. Lu chi si pó liggjí illu paisaggju, tandu, diventa espressioni di la cultura, di li tipulugii di fràbbicu, di li módi di trattà la tarra, di li ’alóri di li pópuli e di l’identitai sói, no sólu la chi vóni aé, ma ancóra la chi ani autu o chi l’ani assignatu.
Ill’últimi dui séculi l’Omu s’è cumpultatu com’e chi la so’ capazzitai trasfulmadóra no aíssia límiti, e l’emu pudutu ’idé da lu sfruttamentu di lu tarrenu pa’ li minerali e piú e piú pa’ li cumbustíbbili fóssili, finz’a chista fasi di transizioni ecológica. S’è fulmata una ’isioni di la natura com’e custruttu sociali, mintali, chi nasci da l’attilbimentu e da li manéri di pinsà paltuti da la socetai: l’Omu mudifichiggja la tarra paltendi da l’idea chi à di la tarra mattessi e di comu chista andaria trasfulmata. Pudemu finz’e chi mintuà lu cuncettu di wilderness, chi, applicatu in sensu negativu a li spàzii impruduttivi (e dunca, in una socetai com’e la nostra, prii di ’alóri), è statu pói idintificatu cu’ li ’alóri estétichi di la natura aresta, idea da undi so dapói nati li palchi naziunali da una palti, e chi à da l’alta raffulzatu l’eccisu di li spàzii incuntaminati, lóchi palfetti, pa’ calch’e unu, pa’ l’investimenti di socetai turístichi manni, distinati a sliassi da la spiriènzia di li passoni natii e fàcili a uttiné cun pochi franchi.
E tandu, siddu chi vulemu sighí chistu rasgiunamentu, óggji, doaríami pinsà a affruntà la chistioni ambientali paltendi da una dummanda impultanti: la tarra salda, in chistu sensu, cal è chi dizzidi comu andaria trasfulmata, e pal cali rasgioni pó fallu? Vi so suggjetti chi ancóra, a livéllu centrali, ani lu pudéri (pulíticu, ecunómicu), di dizzidí comu la Saldigna doaria accarà la transizioni ecológica, e chi in un mumentu dílicu com’e chistu spígnini pa’ attraissà tutti li fasi di realizzazioni di li pruggjetti chena tiné contu di la ’ulintai di li comunitai, di li soluzioni ignittati da l’enti locali, brinchendi lu princípiu di sussidiarietai chi staci a la basi di la democrazia. Ma pa’ cumprindí ancóra meddu lu di chi semu faiddendi, vi saríani ancóra alti cosi di piddà in cunsidéru.
Li paisaggji, primma d’esse paisaggji, so lóchi. Li lóchi so impultanti palchí òffrini un riferimentu a l’identitai umani. Lu nostru sensu d’identitai dipendi da li spirienzi liati a li lóchi chi fricuintemu e undi campemu. In chistu sensu, un impattu mannu ill’attilbimentu di l’identificazioni nostra dipendi puru da alti fattóri, com’e la cunniscènzia di la stória di chisti lóchi, ma ancóra da la narrazioni di l’eventi stórichi, da li mattessi nommi di li lóchi. Faiddemu di sensu di lu lócu pa’ ignittà lu sintitu chi li passoni ani illi cunfronti di celti lóchi. Lu sintimentu d’appaltinènzia di una passona è liatu a lu so’ sensu di lu lócu e lu mattessi suzzédi pa’ l’identitai collettiva cumpaltuta da un gruppu sociali.
Lu rólu di la comunitai e di li cumitati, cussí puru comu lu di li ténnichi di lu settóri, è d’impoltu mannu pa’ lu fràicu di un modéllu di transizioni ecológica chi tènghia contu di chisti fattóri, di li nizissitai enelgétichi di chici e di li folmi di speculazioni chi semu ’idendi. Aemu, tandu, di rasgiunà com’e comunitai salda innantu a comu li trasfulmazioni e l’azioni d’óggji arani a mudificà l’echilíbbriu di li rappolti tra lu sintitu cumunu e la tarra, tra li lóchi e la so’ ’jenti, tra chissi alburéddi frunduti e la manéra chi emu di figgjulalli. Palchí la chistioni di fundu, a ultiméra, no è imbarà ill’assentu e illu cunsalvadorismu chi à fattu avvilinà lu mundu finz’a óggji. Cussí comu no pó esse nemmancu lu sacrifíziu di li lóchi e di lu rappoltu chi aemu cun la tarra nostra pa’ pulítichi capitalístichi mascarati da sustenibilitai.
Immaggjinemu, tandu, la Saldigna chi vulemu abità, fendi in módu chi illu paisaggju, tra li fatti chi no si ’ídini, vi síani pintati li scióari e li pusizioni felmi chi emu présu óggji. Spirendi chi chisti, illu tempu ’inidóri, arani a esse la mimória di la nostra autuditilminazioni. E chi sia una manéra pa’ spaglí cuscènzia innantu a lu ’éru prublema chi accaremu da gjinirazioni. Pa’ no rischià chi mirati tróppu supelficiali, pa’ mintuà torra a don Baignu, siani un dumani la causa di un altu pintimentu.
Fotografii: Caterina Vittoria Roselli
