Sa chida passada amus imbiadu carchi pregunta a sos candidados / sas candidadas.
Sa primu risposta est arribbada.
Arrespustas de Renato Soru
Sa Sardìnnia oi in su cuntestu internatzionali
Sa Sardìnnia depit essi logu de paxi, esèmpiu po su Mediterràneu mari.
Sa Sardìnnia tenit gravàminis militaris tropu mannus. Depeus ammanniai is polìticas po su smenguamentu de is tzerachias militaris e sa faina de is polìgonus.
Faeus duus proponnimentus:
Is arrelatas cun s’Itàlia
Totu sa primu parti de su programma nostu tenit comenti a tìtulu “La seconda Autonomia”. Depeus scriri unu Statutu nou, ddu depit fai su Consillu Regionali e una “Consulta statutaria”. Est ora de torrai a scriri cali funt is arrelatas aintru de is poderis sardus (Consillu, Giunta, Presidenti) e cali funt is arrelatas cun su su Stadu e cun S’Europa.
Impari cun custu depeus cambiai meda e ammanniai meda s’aina de is “norme di attuazione dello Statuto”, arrexonendi de una bisura tènnica e fintzas de una bisura polìtica.
Impari a su Statutu e is normas de atuatzioni, tocat a scriri una lei statutària noa.
Continuidadi territoriali
Is sardas e is sardus tenint su deretu a si movi cun libbertadi e cun is prètzius chi paganti is àterus citadinus de s’Europa, aintru de sa Sardìnnia e foras de Sardìnnia. Oi, po nexi de su Guvernu sardu e no sceti, una chistioni de deretus de unu pòpulu est presentau comenti unu problema de serbìtzius “calmierati”. No est diaici.
Po su chi pertocat sa continuidadi territoriali, tocat chi sa Regioni fetzat unu progetu ùnicu de continuidadi, unitàriu, chi pongat apari is aeroportus de Casteddu, Terranoa e S’Alighera, de manera chi peruna logu de Sardìnnia aturit foras de is deretus chi teneus. Tocat a acrarai cun sa Comissioni Europea ita bolit nai “serbìtzius mìnimus”.
Perou continuidadi territoriali no est sceti sa de si aparèchius. Teneus de binci fintzas sa batalla po sa continuidadis in is maris e sa continuidadi de totu su chi produseus.
Trasportus
Sa Sardìnnia si depit torrai a pensai comenti a prataforma intermodali e no coment’e serbìtzius de trasportus chi no si fueddant apari.
Arst e Trenitalia depint trabballai impari.
Po is caraterìsticas de s’Ìsula, is trasportus aintru de meda regionis stòricas funt difìtzilis e, perou, est unu deretu chi depeus donai a totu is sardas e sardus.
Su dinai de su PNRR podit serbiri, e ndi depeus agatai àteru.
Transitzioni energética
Su Thyrrenian Link no est sceti una manera de cumpriri s’arretza de is infrastruturas de distributzioni italianas. Est fintzas una manera de ponni “a tzerachia” su sistema energético sardu (idroelètricu, termoelètricu e energías annoàbbilis) a su sistema de produtzioni sitzilianu.
Su proponnimentu nostu impitzus de sa transitzioni energètica est chi custa depit serbiri a is sardus. Mai prus asuta de nemus, mancu po su chi pertocat s’energia.
Su produsi energia birdi depit serbiri a is sardus, ddu depint detzidi is sardus. Su soli e su bentu funt su petròlliu de Sardìnnia.
Tocat a fraigai, con d-una lei, su “Ente Regionale Energia Sarda” po ammanniai progetus e infrastruturas chi serbint a is sardus, e po ndi bogai totu su chi est speculatzioni privada. Sa lei chi eus a fai at a depi scriri, imperendi s’artìculu 4 de su Statutu, comenti si produsit, comenti s’allogat e comenti si fait sa distributzioni de s’enèrgia in Sardìnnia.
Imàgini: Soru
